Nautaskrá

Tæplega þrír fjórðu hlutar afkvæma Úranusar er tvílitur og ber mest á húfóttum og krossóttum. Af grunnlitum eru rauðir litir mest áberandi en allir grunnlitir nema gráir koma fyrir. Dætur Úranusar eru gríðarlega mjólkurlagnar en fituhlutfall í mjólk er undir meðallagi en próteinhlutfall liggur nærri því. Þetta eru stórar kýr, háfættar, boldjúpar með miklar útlögur en aðeins veika yfirlínu. Malirnar eru breiðar, eilítið hallandi og nokkuð flatar. Fótstaða er góð, bein, rétt og sterkleg. Júgurgerðin er öflug, mikil júgurfesta, áberandi júgurband og júgrin ákaflega vel borin. Spenar eru vel gerðir, hæfilega grannir og stuttir en örlítið gleitt settir. Mjaltir eru frábærar og mjög lítið er um galla í mjöltum. Skap þessara kúa er mjög gott. Ekki er þekkt að Úranus gefi hyrnd afkvæmi.