Nautaskrá

Frétt

Ný reynd naut að koma í dreifingu

Fagráð í nautgriparækt ákvað á fundi sínum í gær að alls verða 17 reynd naut í dreifingu í sumar. Áfram verða í dreifingu; Logi 06019, Rjómi 07017, Keipur 07054, Blámi 07058, Blómi 08017, Þáttur 08021, Flekkur 08029, Gói 08037, Gustur 09003, Bolti 09021, Gæi 09047, Ferill 09070 og Dráttur 09081.

Þau naut sem koma ný til notkunar eru úr 2010 árgangnum. Þetta eru: Strákur 10011 frá Naustum í Eyrarsveit undan Pontíusi 02028, mf. Kaðall 94017, Drangi 10031 frá Bakka í Öxnadal undan Glæði 02001, mf. Ás 02048, Fossdal 10040 frá Merkigili í Eyjafirði undan Glæði 02001, mf. Hamar 94009, og Bætir 10086 frá Núpstúni í Hrunamannahreppi undan Síríusi 02032, mf. Stöðull 05001.

Nautsfeður verða; Keipur 07054, Gustur 09003, Bolti 09021, Strákur 10011 og Fossdal 10040.

Þau naut sem tekin verða úr notkun eru Kraki 09002, vegna lágra efnahlutfalla og lítillar notkunar, Þytur 09078, vegna mjög lágra efnahlutfalla, og Brúnó 09088, vegna lækkunar í mati þar sem hann er kominn niður í 100 í heildareinkunn. Fagráði þótti ekki stætt á því að hafa Þyt 09078 áfram í dreifingu vegna hinna mjög lágu efnahlutfalla í mjólk dætra þrátt fyrir að hann standi með 113 í heildareinkunn.

Nánari upplýsingar um þessi naut er að finna hér á nautaskra.net. Þau munu koma til dreifingar á næstu vikum eða við næstu sæðisáfyllingar í kútum frjótækna.

Þá hefur kynbótamat allra gripa verið uppfært í Huppu en það var keyrt núna í júní. Í samræmi við það hafa orðið breytingar á skrám yfir nautsmæður og efnilegar kvígur sem menn eru beðnir að veita sérstaka athygli. Við óskum eins og áður eftir því að kýr og efnilegar kvígur með flagg í Huppu verði sæddar með nautsfeðrum.

/gj