Nautaskráin

Rangt nafn á spjaldi með ábendingum um skyldleika

Guðmundur Jóhannesson — Mon, 22 Apr 2013 21:34:50 +0000

Á síðasta spjaldi með ábendingum um skyldleika sem fylgdi síðustu nautaskrá er rangt farið með nafn Laxa 11050. Þar stendur all víða Grámi 11050 en á að vera Laxi 11050.

Bestu nautin fædd 2005 verðlaunuð

Guðmundur Jóhannesson — Fri, 19 Apr 2013 14:55:17 +0000

Á ársfundi Fagráðs í nautgriparækt sem haldinn var að Gauksmýri í Húnaþingi fimmtudaginn 18. apríl s.l. voru afhent verðlaun fyrir besta nautið fætt árið 2005. Að þessu sinni hlutu tvö naut þessa nafnbót og er það í fyrsta sinn sem það gerist frá það að þessi verðlaun voru fyrst veitt. Þau naut sem nafnbótina hlutu eru Vindill 05028 frá Ytri-Tjörnum í Eyjafirði og Birtingur 05043 frá Birtingaholti 1 í Hrunamannahreppi.

Guðmundur Jóhannesson, ábyrgðarmaður í nautgriparækt hjá RML, afhenti verðlaunin og fór um leið nokkrum orðum um þessi afbragðsnaut. Bæði eru þau synir Stígs 97010 frá Oddgeirshólum og móðurfaðir beggja er Kaðall 94017 frá Miklagarði. Þau gefa miklar mjólkurkýr með ákaflega sterka og góða júgur- og spenagerð auk þess sem mjaltir eru með ágætum. Notkun þeirra hefur verið mikil í vetur enda um afbragðsgripi að ræða.

Benjamín Baldursson bóndi á Ytri-Tjörnum og ræktandi Vindils tók við verðlaunum fyrir Vindil á fundinum en Ragnar Magnússon bóndi í Birtingaholti 1 og ræktandi Birtings átti ekki heimangengt. Honum voru því afhent verðlaunin í dag og við það tækifæri var meðfylgjandi mynd tekin.

Eva María Magnúsdóttir, Ragnar Magnússon og Hvítkolla 1458 Skurðsdóttir 02012 og sammæðra Birtingi 05043.

Upplýsingar um tvö ný ungnaut

Guðmundur Jóhannesson — Thu, 21 Mar 2013 08:49:23 +0000

Nú eru komnar inn upplýsingar um tvö ný ungnaut úr 2011 árgangi nauta. Þetta eru nautin Bryti 11070 frá Akurey 2 í V-Landeyjum undan Gylli 03007 og Búbót 580 Stígsdóttur 97010 og Kjarni 11079 frá Seljatungu í Flóa undan Ófeigi 02016 og Seríu 313 Laskadóttur 00010. Bryti er sammæðra Skjá 10090.
Ungnautaspjöld með upplýsingum um þessi naut verða tilbúin til útsendingar innan tíðar en þau er að finna hér á vefnum á pdf-skjölum að venju. Þessi naut munu fljótlega fara í dreifingu en þetta eru síðustu nautin úr 2011 árgangnum sem koma til dreifingar og verða þeir þá orðnir 26 talsins.

Upplýsingar um 8 ný naut í 2011 árgangi

Guðmundur Jóhannesson — Wed, 13 Feb 2013 13:08:03 +0000

Nú eru komnar inn upplýsingar um 8 ungnaut úr 2011 árgangi nauta hér á nautaskra.net. Upplýsingarnar er bæði að finna á hefðbundnu formi sem og á pdf-skjölum af ungnautaspjöldunum sem gefin verða út að venju. Þau fara til dreifingar til bænda innan skamms.
Um er að ræða eftirtalin naut; Laxa 11050 frá Laxamýri 2, Norðurþingi undan Síríusi 02032 og Safíru 206 Laskadóttur 00010, Skell 11054 frá Lágafelli í A-Landeyjum undan Ára 04043 og Míu 214 Ássdóttur 02048, Ottó 11058 frá Tjörn í Skagabyggð undan Tópasi 03027 og Glóð 079 Glæðisdóttur 02001, Kóng 11059 frá Seljavöllum í Hornafirði undan Gylli 03007 og Kórónu 374 Laskadóttur 00010, Öxndal 11061 frá Steinsstöðum 2 í Hörgársveit undan Ófeigi 02016 og Pöddu 131 Þollsdóttur 99008, Sæ 11063 frá Naustum í Eyrarsveit undan Stássa 04024 og Hosu 248 Taktsdóttur 06046, Öllara 11066 frá Ölkeldu 2 í Staðarsveit undan Ófeigi 02016 og Jönu 432 Stígsdóttur 97010 og Tandra 11068 frá Dalbæ í Flóa undan Ára 04043 og Teygju 362 Ássdóttur 02048.

Þessi naut eru að byrja í dreifingu.

Nautaskrá veturinn 2013 komin í dreifingu

Guðmundur Jóhannesson — Fri, 11 Jan 2013 11:57:15 +0000

Nautaskrá Nautastöðvar BÍ fyrir veturinn 2013 er á leið til bænda í prentútgáfu ásamt fylgispjöldum um skyldleika og reynd naut. Skráin og fylgispjöldin eru einnig aðgengileg hér á netinu í pdf skjölum auk þess sem upplýsingar um hvert og eitt naut er líka að finna hér á nautaskra.net.

Athygli er vakin á því að í prentútgáfu slæddust meinlegar villur í myndum af stöplaritum um nautin Kamb 06022 á blaðsíðu 28 og Dynjanda 06024 á blaðsíðu 30. Villurnar lýsa sér í því að stöplarnir í stöplaritunum eru rangir en tölurnar hins vegar réttar. Þessar villur hafa verið leiðréttar í pdf-skjalinu af nautaskránni hér á vefnum.

Hæð dætra reyndra nauta

Guðmundur Jóhannesson — Mon, 07 Jan 2013 13:41:28 +0000

Við vekjum athygli á því að í nýjustu nautaskránni er stutt yfirlit yfir hæð dætra þeirra reyndu nauta sem eru í skránni. Með hæð dætra er átt við hvort þær eru há- eða lágfættar. Þessi eiginleiki hefur verið metinn í kúaskoðun frá árinu 2008 og var þar komið til móts við óskir kúabænda sem eðlilega vilja fremur háfættar en lágfættar kýr.
Við skoðun á gögnum hefur komið í ljós að vel hefur tekist að koma þessu mati inn í kúaskoðun og arfgengi þessa eiginleika er fremur hátt. Enn er hins vegar ekki farið að reikna kynbótamat fyrir eiginleikann en meðaltöl úr kúaskoðun fyrir þau reyndu naut sem verða í notkun í vetur birt.
Yfirlitið er einnig að finna hér á nautaskra.net.

Sjá nánar:
Hæð dætra reyndra nauta í nautaskrá 2013

Nautskrá veturinn 2013

Guðmundur Jóhannesson — Fri, 21 Dec 2012 15:09:02 +0000

Nautaskrá Nautastöðvar BÍ fyrir veturinn 2013 er komin á netið. Skráin verður send út í fyrstu viku nýs árs til kúabænda ásamt fylgispjöldum um skyldleika og reynd naut. Þangað til verða bændur að láta jólabækurnar duga eða skoða skrána á netinu.

Tvö ný reynd naut í notkun

Guðmundur Jóhannesson — Tue, 27 Nov 2012 10:25:05 +0000

Kynbótamatið hefur nú verið uppfært hér í nautaskránni ásamt þeim reyndum nautum sem verða í notkun næstu mánuði. Tvö ný reynd naut koma inn núna og er það þeir Víðkunnur 06034 frá Víðiholti í Reykjahverfi, faðir Þrasi 98052, móðurfaðir Stígur 97010, og Töfri 06043 frá Ytri-Tjörnum í Eyjafirði, faðir Umbi 98036, móðurfaðir Kaðall 94017. Þess má geta að Töfri er sammæðra Vindli 05028. Þrjú naut verða tekin úr notkun og eru það Máni 03025 (sæði búið), Renningur 05014 og Herkúles 05031.

Nautsfeður til notkunar næstu mánuði verða Baldi 06010, Kambur 06022, Hjarði 06029 og Víðkunnur 06034, en þeir tveir síðar nefndu koma nýir inn sem nautsfður nú. Þau naut sem falla af nautsfeðraskrá núna eru Vindill 05028, Frami 05034, Birtingur 05043 Koli 06003. Eftir sem áður verða teknir nautkálfar undan þeim á næstu mánuðum á stöð og biðjum við því um að tilkynnt verði um syni þeirra og nautsmæðra þegar þeir fæðast.

Upplýsingar um 8 ný ungnaut

Guðmundur Jóhannesson — Tue, 23 Oct 2012 16:24:07 +0000

Komnar eru upplýsingar um 8 ný ungnaut úr 2011 árgangi nauta hér á vefinn. Þetta eru naut á númerabilinu 11022-11051. Þessi naut eru synir Áss 02048, Ára 04043, Flóa 02029, Glæðis 02001, Gyllis 03007 og Síríuss 02032. Þessi naut eru ekki farin í dreifingu enn. Að venju er einnig hægt að nálgast pdf-skjal með þessum nautum til skoðunar og útprentunar.

Heimsóknum á nautaskra.net hefur fjölgað um 64%

Guðmundur Jóhannesson — Fri, 21 Sep 2012 13:08:53 +0000

Heimsóknatíðni á nautaskra.net hefur okkur til mikillar ánægju aukist til muna á þessu ári samanborið við árið 2011. Það sem af er ári hefur heimsóknum á síðuna fjölgað um 64% miðað við sama tímabil í fyrra. Á þessu ári hafa 1.654 aðilar heimsótt nautaskrána í 6.430 heimsóknum og hefur gestum fjölgað um rúm 70% frá sama tíma og í fyrra. Síðuflettingum hefur einnig fjölgað verulega og þannig eru þær 51.457 það sem af er ári eða 65% fleiri en í fyrra. Þá hefur lengd heimsókna á síðuna einnig aukist og er meðallengd heimsókna núna 5:31 mínútur eða tæpum 13% lengri en í fyrra. Það er því greinilegt að kúabændur kunna vel að meta að hafa aðgengi að nautaskránni á netinu og æ fleiri gefa sér betri tíma en áður til þess að skoða og velta nautunum fyrir sér. Auk þessa má nefna að farsíma- og spjaldtölvuvefurinn hefur fengið góðar viðtökur en hann hefur fengið 249 heimsóknir frá því hann var opnaður þann 16. apríl s.l. Það er prýðileg notkun fyrir svo sérhæfðan vef.