Nautaskrá

Nautastöðin keypti 76 nautkálfa sem fæddir voru árið 2010. Nautkálfarnir komu af öllum landssvæðum en flestir þó af Suðurlandi, eða rúmlega 50% þeirra. Nú er það rétt að skýrast hver verða afdrif kálfanna. Í meðfylgjandi yfirliti má sjá hvaða kálfar voru keyptir, hvaðan þeir voru keyptir og hverjir voru feður þeirra. Þá er í lokin getið um hver urðu afdrif þeirra, hvort sæði úr þeim fór/fari í dreifingu eða hvers vegna þeir voru felldir. Ástæður þess að kálfum er fargað í uppeldi eru margvíslegar en þó eru allmargir felldir vegna þess að þeir stökkva ekki og einnig vegna þess að þeir þrífast ekki og ná því ekki eðlilegum þroska. Nú standa vonir til að 28 þeirra fari í prófun hjá bændum og er það mjög góður fjöldi og verður þessi árgangur með þeim stærstu sem hafa farið í afkvæmarannsókn. Þau naut, sem sæði úr fer í dreifingu, eru undan 11 nautsfeðrum og enginn einn nautsfaðir á marga syni í þeim hópi. Þetta hefur verið stefna undanfarinna ára og þó árlegar erfðaframfarir verði væntanlega nokkru lægri, þá er gert ráð fyrir að skyldleikaræktaraukningin verði einnig minni.